前两天，我乘辣224路公交车浪，偶然听到一位上海老爷叔带辣伊个小孙子，垃拉跟一位怀里抱了小囡个年轻妈妈乘客聊天对话，老爷叔讲：“阿拉小孙子，辣幼儿园里，多数侪讲普通话，连得读1、2、3、4、5、6、7、8、9、10数字时，其中一半仅用上海闲话读。可以讲，上海闲话小家伙已经讲勿里起了。”伊又接牢仔讲：“有辰光，我只好也用生硬个普通话跟小家伙对话交流了。”年轻妈妈笑笑说：“是额，呒没错。”表示同感。

         各位老小孩朋友们：听了上面搿一老一青两位乘客简短对话，侬想到点啥？或许侬勿觉（角）着，别过，让我想到一个问题：看来，上海方言，眼看将来要辣阿拉下一代，特别是现在年轻父母家庭中额下一代小囡中失传了。如果讲，中学、小学、幼儿园里只重视普及普通话，勿讲上海闲话，再加上小朋友辣屋里厢，老人以及年轻爸爸妈妈同样习惯用普通话跟自家小囡交流闲话，葛么，可想而知，小囡们就会自然成习惯，慢慢交、慢慢交就将日常丰富额上海方言，统统忘记脱清清爽爽，假使讲偶然讲两句出来，也势必成了正宗个“洋泾浜”腔调了。

         就其上述迭种介额现实状况和原故，为了让阿拉传统个上海方言得到良好个传承发展，我建议：各位老小孩朋友，尤其是老阿姨、老爷叔、外公外婆、阿爷阿娘、年轻个上海父母亲们，请哪大家辣自介屋里厢，尽可能跟小囡用上海方言（沪语）嘎山湖、聊天、交流，勿仅仅让小囡听得懂上海闲话，而且要伊拉讲得来，讲得来赛。我想，只要阿拉大家侪重视从小囡中传承好上海方言，使得沪语口语小囡能熟练用词，发音准确，并且听起来，感觉到邪气刮辣松脆，相信阿拉上海方言文化，定会得到发扬光大，勿断丰富多彩，而上海独有额语言文化生活特色腔调，必然会一代一代得到传承下去，侬讲对勿对？

(注：您的设备不支持flash)