立冬节气刚刚过脱呒没多少日脚, 天气明显一天比一天冷下来了, 西北风又要开始无天野地个刮起来了。 搿段辰光, 正是到了吃蟹个黄金季节。 蟹又成了人们酒后茶余津津乐道个热门话题, 蟹贩子, 迭歇辰光托蟹大发财, 喜上眉梢； 购蟹者, 掏铜钿买蟹讲交情, 沾沾自喜； 吃蟹人, 老酒扳扳论英雄, 眉飞色舞……

别过, 我对蟹却并呒没哪能介老好感, 伊辣我心目中形象欠佳, 原因有二：  一是腥气太大,  二是霸气十足, 搿种偏见恐怕是来源于老早子阿拉小辰光个成见了。

        五十多年前, 虽然讲起来我还是刚刚懂眼事体个小囡,  勿瞒侬讲, 伊歇辰光, 阿拉常常早上头老清老早要帮阿拉姆妈, 到小菜场里去排队买小菜。 一到金秋十月之后, 经常看到菜场里头鱼摊头浪, 卖蟹个生意邪气闹猛, 尤其是一只只铁丝笼脱仔大脚盆里, 像叠罗汉一样, 盛满了大大小小个爬行物——清水蟹, 口吐白沫, 腥气扑鼻, 走过路过总归要捏仔鼻头而过, 特别是看到一对对毛毛拉拉/ 张牙舞爪个蟹钳, 心里总觉着有点吓丝丝个。曾经有过一趟, 阿拉有眼勿煞相, 贱骨头好奇心, 就用手指头伸过去, 碰碰一只看上去一动不动个蟹钳, 辣猛生头被一只恶狠狠个蟹钳咬牢仔手指头勿肯放开, 当场痛的我哇哇叫, 亏的卖蟹师傅见况用伊拿手一招迅速相救, 迭只强凶霸道个蟹钳总算乖乖交松开了牙口, 之后, 我被咬个手指头还隐隐交痛了好长辰光呢。 几十年过去了, 每当看到一只只大闸蟹, 浑身自然会的汗毛凛凛个, 故所以至今对蟹有所耿耿于怀。

       蟹个霸气可谓出了名, 侬看看伊一身硬壳武装, 腔调一路横冲直撞, 弹眼落睛, 腔势可憎, 有目共睹。 记得小学六年级辰光, 读过荀子个《劝学篇》：“蟹八跪而二螯, 非蛇之穴无可寄居者", 既懒又霸, 迭句词句一直铭刻在心。  可见横行霸道搿句成语, 正是蟹个最形象个写照了。 难怪, 菜场里特别对个头大搭仔分量重个大闸蟹, 非得要用粗绳子搏牢仔出售呢。

      勿晓得从啥辰光开始, 蟹又增添了一项" 贵 气", 搿个卖相难看个怪物, 竟然堂堂正正称霸于餐桌之上了, 可以讲, 凡是宾馆、 饭店、 酒家个宴席浪, 或者私人屋里厢吃饭台子告头, 有伊迭只老鬼三上台面, 葛末其档次、 级别、 规格大大地提高了, 怪物一下子变成了宠物。 尤其是, 经一些人互相哄抬, 其以只论价个价钿, 像高血压病人碰到急事体一样, 辣辣叫指标直线飙升, 身价百倍, 甚至令人瞠目结舌。

        今朝讲蟹之三气, 假使讲"腥气" 脱仔"霸气"属先天生成, 是传统个说法, 但是蟹个"贵气"确明摆了是后天被"炒作"个结果, 又是人为造成个呢。 市面浪常有一种讲法:" 买蟹个勿吃蟹, 吃蟹个勿买蟹", 活龙活现了蟹个公关形象。 而蟹之所以能成为"贵族", 从某种程度浪讲主要还由于用"公字"个钞票为伊作了广告, 垫了底脚, 上了台阶。

        垃拉迭歇商品社会脱仔市场经济个今朝, 贩蟹、买蟹、 吃蟹侪无可非议, 而对蟹个态度, 是讨厌、 憎恨, 还是欢喜、 爱好, 完全取决于各人个需求, 勿可一概而论。 辣搿搭建议有空闲话, 劝君可以读读《劝学篇》，对搿种"爬行物"个气味个辨别, 或许对侬会有帮助个, 一旦自介有机会吃起蟹来, 也好晓得嘴巴里向个味道, 究竟是"腥"还是"鲜"哦? !

(注：您的设备不支持flash)